आयपीएल २०२६ चा बहुप्रतिक्षित महासंग्राम आज, शनिवार (दि. २८) पासून रंगणार आहे. गतविजेता रॉयल चॅलेंजर्स बेंगलुरू अर्थात आरसीबी आपल्या विजेतेपदाच्या बचावासाठी सज्ज झाली आहे. उद्घाटनाच्या सामन्यात एम. चिन्नास्वामी स्टेडियमवर आरसीबीचा सामना सनरायजर्स हैदराबाद या तगड्या संघाशी होणार आहे.

या हायव्होल्टेज सामन्यात सर्वांच्या नजरा असतील त्या विराट कोहलीच्या खेळीवर. कोहलीसोबत फिल सॉल्ट डावाची सुरुवात करेल, अशी शक्यता आहे. जेकब बेथेलच्या फॉर्मकडेही लक्ष असेल, तर देवदत्त पडिक्कल तिसऱ्या क्रमांकावर फलंदाजी करताना दिसू शकतो. कर्णधार रजत पाटीदार चौथ्या क्रमांकावर संघाची धुरा सांभाळेल.

यष्टिरक्षक म्हणून जितेश शर्मा संघात असेल. टीम डेव्हिड आणि रोमारिओ शेफर्ड यांच्यासारखे स्फोटक फलंदाजही अंतिम संघात स्थान मिळवू शकतात. गोलंदाजीत भुवनेश्वर कुमारवर मोठी जबाबदारी असेल, तर मंगेश यादवला संधी मिळण्याची शक्यता आहे.

दुसरीकडे, सनरायजर्स हैदराबादकडेही तगडी फलंदाजी फळी आहे. ट्रॅव्हिस हेड आणि अभिषेक शर्मा सलामीला येतील, तर इशान किशन तिसऱ्या क्रमांकावर खेळेल. हेनरिक क्लासेन, लियाम लिव्हिंगस्टोन आणि नितीश रेड्डी मधल्या फळीत मजबुती देतील.

गोलंदाजीत जयदेव उनाडकट आणि हर्षल पटेल वेगवान आघाडी सांभाळतील, तर झिशान अन्सारी फिरकीची जबाबदारी पार पाडेल. एकूणच, IPL 2026 चा हा पहिला सामना रोमांचक होण्याची चिन्हे स्पष्ट आहेत. क्रिकेट चाहत्यांसाठी आजचा दिवस म्हणजे उत्सवच !

गेल्या ३९ वर्षांपासून…हेच ते व्यासपीठ, जिथे कलाकार घडतात आणि रसिकांची मनं जिंकली जातात.

सातारा शहरात आधुनिक नाट्यगृहाची गरज ओळखून सातारा नगरपालिकेने दूरदृष्टी ठेवत या भव्य वास्तूची उभारणी केली. १८ सप्टेंबर १९८६ रोजी विधान परिषदेचे तत्कालीन सभापती जयंतराव टिळक यांच्या हस्ते या कलामंदिराचे लोकार्पण करण्यात आले आणि सातारच्या सांस्कृतिक विश्वाला नवी दिशा मिळाली.

आधुनिक मेकअप रूम्स…
भक्कम रंगमंच…
आणि ९०० प्रेक्षकांची आसनक्षमता…

या सर्व सुविधांमुळे, महाराष्ट्रातील कानाकोपऱ्यातून कलाकार इथे येतात. मुंबई, पुणे, कोल्हापूर, नाशिक, नागपूर…सर्वांसाठी हे एक हक्काचं व्यासपीठ बनलं आहे.

दरवर्षी इथे रंगतात ५० पेक्षा अधिक व्यावसायिक नाटके तसेच शालेय आणि महाविद्यालयीन कार्यक्रमांचीही मोठी रेलचेल एकांकिका, संगीत रजनी, कला स्पर्धा आणि विविध सांस्कृतिक कार्यक्रमांनी शाहू कलामंदिर सतत गजबजलेलं असतं.

उत्कृष्ट ध्वनी-प्रकाश व्यवस्था, स्वच्छता आणि नियोजन यामुळेच हे नाट्यगृह कलाकार आणि प्रेक्षकांच्या मनात खास स्थान मिळवतं. शाहू कलामंदिर केवळ एक इमारत नाही.तर साताऱ्याच्या सांस्कृतिक ओळखीचं हृदय आहे.

मलकापूर शहरात एक भीषण अपघात घडला असून, भरधाव मोटारीने भाजी मंडईत घुसून चार महिलांना तसेच चिरडल्याची धक्कादायक घटना समोर आली आहे. या अपघातात एका महिलेचा मृत्यू झाला असून, तिघींवर उपचार सुरू आहेत.

मिळालेल्या माहितीनुसार, कोयना वसाहत परिसरात सायंकाळी साडेसातच्या सुमारास ही घटना घडली. महामार्गाच्या दिशेने भरधाव वेगाने जाणारी मोटार अचानक नियंत्रण सुटून भाजी मंडईत घुसली. या मोटारीने प्रथम एका दुचाकीला धडक दिली आणि त्यानंतर भाजी विकत बसलेल्या महिलांना चिरडत पुढे जाऊन रस्त्यालगतच्या कठड्यावर आदळून अडकली.

या भीषण अपघातात उषा बाळू रौंदाळे (वय ४७, रा. मलकापूर) यांचा जागीच मृत्यू झाला. तर रूपाली मारुती पाटील (वय ३७, रा. काले), दीपाली सचिन हुलवान (वय ३८) आणि ज्ञानदा सचिन हुलवान (वय १३) या तिघी जखमी झाल्या असून त्यांच्यावर येथील कृष्णा रुग्णालयात उपचार सुरू आहेत.

दरम्यान, ही मोटार एका महिलेकडून चालवली जात असल्याची माहिती तेथील रहिवासी लोंकाकांकडून दिली जात आहे. अपघातानंतर घटनास्थळी मोठी गर्दी जमली होती.या घटनेने मलकापूर परिसरात खळबळ उडाली असून, पोलिसांनी घटनास्थळी धाव घेऊन पुढील तपास सुरू केला आहे.

सातारा जिल्हा परिषदेत पुन्हा एकदा सत्तासंघर्ष पेटण्याची शक्यता निर्माण झाली आहे. अध्यक्ष-उपाध्यक्ष निवडीनंतर आता सर्वांचे लक्ष लागले आहे.चार सभापती पदांच्या निवडीकडे… आणि या निवडणुकीत पुन्हा ‘ऑपरेशन लोटस’ चर्चेत आले आहे.७ फेब्रुवारीला झालेल्या निवडणुकीत कोणत्याही एकाही पक्षाला स्पष्ट बहुमत मिळाले नव्हते. भाजपला २७, राष्ट्रवादीला २० तर शिंदेसेनेला १५ जागा मिळाल्या. बहुमतासाठी आवश्यक असलेल्या ३३ सदस्यांच्या आकड्यापासून सर्वच पक्ष दूर होते.

याच पार्श्वभूमीवर राष्ट्रवादी आणि शिंदेसेना एकत्र येऊन सत्ता स्थापनेची तयारी करत असताना, भाजपने ‘ऑपरेशन लोटस’ राबवत काही सदस्यांची साथ मिळवली… आणि सत्ता आपल्या बाजूने वळवली.

आता पुन्हा एकदा तसाच सत्तासंघर्ष सभापती निवडीच्या निमित्ताने पाहायला मिळणार का? हा मोठा प्रश्न उपस्थित होत आहे. ४ एप्रिलला महिला व बालकल्याण, समाजकल्याण आणि इतर दोन विषय समित्यांच्या सभापतींची निवड होणार आहे. यासाठी सकाळी १० ते दुपारी १२ या वेळेत नामनिर्देशनपत्रे स्वीकारली जाणार आहेत.गरज भासल्यास दुपारी मतदान होणार असून, या वेळी सदस्यांना हात उंचावून मतदान करावे लागणार आहे. त्यामुळे कोण कोणाच्या बाजूने उभा राहतो, याकडे सर्वांचे लक्ष लागले आहे.

दरम्यान, भाजप पुन्हा ‘ऑपरेशन लोटस’च्या तयारीत असल्याची चर्चा आहे… तर राष्ट्रवादी आणि शिंदेसेना भाजपला रोखण्यासाठी रणनीती आखत आहेत. त्यामुळे साताऱ्यातील ही निवडणूक ‘हाय टेन्शन’ ठरण्याची शक्यता नाकारता येत नाही.

पुण्यातील वाघोली येथे पार पडलेल्या ६८ व्या महाराष्ट्र केसरी स्पर्धेत नाशिकच्या हर्षवर्धन सदगीरने दमदार कामगिरी करत महाराष्ट्र केसरी किताबावर नाव कोरलं आहे. चांदीच्या गदेसाठी झालेल्या अत्यंत चुरशीच्या लढतीत हर्षवर्धनने सोलापूरच्या महेंद्र गायकवाडला ४-३ अशा एका गुणाच्या फरकाने पराभूत करत विजय मिळवला.या लढतीत सुरुवातीपासूनच दोन्ही मल्ल आक्रमक दिसून आले. महेंद्र गायकवाडने पहिला गुण घेत आघाडी मिळवली, तर हर्षवर्धननेही लगेच प्रत्युत्तर देत बरोबरी साधली.

यानंतर ऐक्टिव्हिटी वेळेत महेंद्रला गुण मिळवता न आल्याने हर्षवर्धनला एक गुण मिळाला. शेवटच्या क्षणी हर्षवर्धनने दोन महत्त्वाचे गुण घेत आघाडी घेतली. महेंद्रनेही दोन गुण घेत जोरदार पुनरागमन करण्याचा प्रयत्न केला, मात्र वेळ संपताच हर्षवर्धनने एका गुणाच्या आघाडीने सामना जिंकला.

या विजयासह हर्षवर्धन सदगीर सातवा डबल महाराष्ट्र केसरी ठरला आहे.

विभागातून महेंद्र गायकवाडने सिकंदर शेखचा ३-० ने पराभव करत अंतिम फेरी गाठली होती. तर गादी विभागात हर्षवर्धनने जय पाटीलला १०-० ने चितपट करत अंतिम फेरीत प्रवेश केला होता.

यंदाच्या स्पर्धेत अनेक दिग्गजांना धक्का बसला असून माजी महाराष्ट्र केसरी विजेते शिवराज राक्षे, पृथ्वीराज पाटील आणि पृथ्वीराज मोहोळ यांना अंतिम फेरीपूर्वीच पराभव पत्करावा लागला.

विजेत्या हर्षवर्धन सदगीरला मानाची चांदीची गदा, टोयोटो फॉर्च्यूनर कार आणि ५ लाख रुपये रोख पारितोषिक देण्यात आले.

महाराष्ट्र केसरीच्या रंगलेल्या मैदानात हर्षवर्धनचा दबदबा पुन्हा एकदा सिद्ध……
आणि कुस्तीविश्वात नवा इतिहास घडला !

सातारा जिल्ह्यातील कराड तालुक्यात राजकीय घडामोडींना वेग आला असून पंचायत समितीच्या इतिहासात पहिल्यांदाच भाजपने सत्ता काबीज करत नवा अध्याय लिहिला आहे.

पंचायत समितीच्या इतिहासात पहिल्यांदाच सभापती आणि उपसभापती या दोन्ही पदांवर भाजपच्या महिलांची निवड झाली आहे. आमदार डॉ. अतुल भोसले आणि आमदार मनोज घोरपडे यांच्या रणनीतीमुळे हे ऐतिहासिक सत्तांतर शक्य झाले आहे. भाजपच्या एकाही मतात फूट पडू नये यासाठी पक्षनेत्यांनी काटेकोर नियोजन केले आणि विरोधकांचा प्रभावी राजकीय ‘गेम प्लॅन’ उधळून लावला.

“भाजपचा कराड पंचायत समितीवर पहिल्यांदाच झेंडा”—-
“महिलांच्या नेतृत्वाला प्राधान्य”

निवडणुकीत कराड दक्षिणमधील विंग गणातील नंदाताई यादव यांची सभापतीपदी, तर कराड उत्तरमधील वाघेरी गणातील अनिता वेताळ यांची उपसभापतीपदी निवड झाली. या निवडीमुळे तालुक्यातील स्थानिक राजकारणात मोठा टप्पा गाठला गेला आहे.कराड तालुक्यातील जिल्हा परिषद आणि पंचायत समिती निवडणुकीतही भाजपने दमदार कामगिरी केली आहे.

१२ जिल्हा परिषद गटांपैकी ८ गटांमध्ये आणि २४ पंचायत समिती गणांपैकी १३ गणांमध्ये विजय मिळवत भाजपने स्पष्ट बहुमताचा कौल मिळवला. अजित पवार यांच्या राष्ट्रवादी काँग्रेसला ४, शरद पवार गटाला ३, काँग्रेसला २ आणि शिवसेना शिंदे गटाला २ जागा मिळाल्या.

“भाजप – १३ / राष्ट्रवादी (अजित) – ४ / राष्ट्रवादी (शरद) – ३ / काँग्रेस – २ / शिवसेना – २”

या ऐतिहासिक विजयामुळे पंचायत समितीवर भाजपने एकहाती सत्ता मिळवली असली, तरी आता खरी कसोटी कामगिरीची असणार आहे.सत्तेसोबतच जबाबदारीही वाढली आहे.

गावपातळीवरील पायाभूत सुविधा, शेतीविकास, पाणीपुरवठा, शिक्षण आणि आरोग्य यांसारख्या महत्त्वाच्या क्षेत्रांमध्ये काम करून जनतेच्या अपेक्षा पूर्ण करणे हे भाजपसमोरील मोठे आव्हान असेल. निवडणुकीतील आश्वासने पूर्ण करत विकासकामांना गती देणे आवश्यक ठरणार आहे.ऐतिहासिक सत्तांतराचा आनंद एकीकडे असला, तरी दुसरीकडे जनतेचा विश्वास टिकवण्यासाठी पंचायत समितीमार्फत प्रभावी आणि विधायक कामगिरी करणे हीच नव्या नेतृत्वाची खरी परीक्षा असणार आहे.

सातारा जिल्ह्यातील प्रमुख धरणांमध्ये सध्या समाधानकारक पाणीसाठा असून, जिल्ह्यातील मोठे आणि मध्यम प्रकल्प मिळून सुमारे १२४ टीएमसी पाणी उपलब्ध आहे. त्यामुळे सध्या पिण्याच्या पाण्याबाबत कोणतीही तातडीची चिंता नसली, तरी उन्हाळ्याच्या पार्श्वभूमीवर पाण्याचा काटकसरीने वापर करण्याचे आवाहन प्रशासनाने केले आहे.

जिल्ह्यातील सर्वात मोठा प्रकल्प असलेल्या कोयना धरणात सध्या ६९.८५ टीएमसी पाणीसाठा असून धरण सुमारे ६६ टक्के भरलेले आहे. कोयना धरणावर सांगली जिल्ह्याचे सिंचन क्षेत्र आणि राज्याच्या वीजनिर्मितीचा मोठा भाग अवलंबून असल्यामुळे हा साठा अत्यंत महत्त्वाचा मानला जात आहे.

याशिवाय उरमोडी धरणात सुमारे ७ टीएमसी पाणी असून ते ७० टक्के भरलेले आहे. कण्हेर धरणात सध्या ६.८५ टीएमसी पाणी असून ते सुमारे ६७ टक्के भरलेले आहे. धोम धरणात ७.४० टीएमसी पाणीसाठा असून ते ५४ टक्के भरलेले आहे.
तर धोम-बलकवडी धरणात २.२७ टीएमसी पाणी असून सुमारे ५८ टक्के पाणीसाठा उपलब्ध आहे.

दरम्यान, तारळी धरणात सर्वात कमी पाणीसाठा असल्याचे दिसून येत आहे. या धरणाची एकूण क्षमता ५.८५ टीएमसी असून सध्या त्यामध्ये २.३४ टीएमसी म्हणजे सुमारे ४० टक्के पाणी उपलब्ध आहे. त्यामुळे या धरणाच्या लाभक्षेत्रातील शेतकरी आणि नागरिकांना पाण्याचा वापर जपून करण्याची गरज आहे.

मध्यम प्रकल्पांमध्ये निरा-देवघर धरणात ७.५८ टीएमसी पाणी असून ते ६३ टक्के भरलेले आहे. भाटघर धरणात १५.९७ टीएमसी पाणीसाठा असून ते ६७ टक्के भरलेले आहे.तर वीर धरणात ५.२८ टीएमसी पाणी असून सुमारे ५३ टक्के पाणीसाठा उपलब्ध आहे.

दरम्यान, आठ धरणांतून सध्या ४ हजार ९५१ क्युसेक पाणी विसर्ग करण्यात येत असून हे पाणी पिण्यासाठी, सिंचनासाठी आणि वीजनिर्मितीसाठी सोडण्यात येत आहे.

गेल्या वर्षी झालेल्या समाधानकारक पावसामुळे धरणांमध्ये चांगला साठा निर्माण झाला आहे. त्यामुळे उन्हाळ्याच्या सुरुवातीला परिस्थिती तुलनेने स्थिर असली, तरी एप्रिल आणि मे महिन्यात तापमान वाढल्यामुळे पाण्याची मागणी वाढण्याची शक्यता आहे.म्हणूनच नागरिकांनी पाण्याचा अपव्यय टाळून त्याचा काटकसरीने वापर करावा, तसेच सिंचनासाठीही पाण्याचे योग्य नियोजन करण्याचे आवाहन जलसंपदा विभागाने केले आहे.

पळशी गावात केवळ ५० रुपये चोरल्याच्या संशयावरून एका १३ वर्षीय मुलाला लाकडी काठीने बेदम मारहाण करण्यात आल्याची घटना उघडकीस आली आहे. या मारहाणीत मुलाच्या हाताला आणि नाकाला फ्रॅक्चर झाले असून त्याच्यावर सध्या उपचार सुरू आहेत. या प्रकरणी म्हसवड पोलिस ठाण्यात आरोपीविरुद्ध गुन्हा दाखल करण्यात आला आहे. माण तालुक्यातील पळशी गावात ही घटना घडली.
पोलिसांनी दिलेल्या माहितीनुसार, ८ मार्च २०२६ रोजी दुपारी सव्वा बारा वाजण्याच्या सुमारास १३ वर्षीय मुलगा मित्रांसोबत रंगपंचमी खेळत होता. त्याच वेळी गावातील रोहित सुभाष लोखंडे याने त्या मुलाला आपल्या दुकानाजवळ बोलावून घेतले.
रोहित लोखंडे याने मुलाला दुकानाच्या गल्ल्यातून ५० रुपये घेऊन ये असे सांगितले. मुलगा गल्ल्यातून पैसे काढत असताना आरोपीने आपल्या मोबाईलमध्ये त्याचे चित्रीकरण केले. त्यानंतर “तू आमच्या दुकानातून पैसे चोरत आहेस” असा आरोप करत त्याला दुकानाबाहेर ओढून नेले.

यानंतर आरोपीने त्या मुलाला लाकडी काठीने दोन्ही पायांवर, पाठीवर आणि हातावर बेदम मारहाण केली. मारहाणीमुळे मुलगा बेशुद्ध पडला. ही माहिती मिळताच त्याचे वडील सचिन श्रीरंग करडे यांनी मुलाला तातडीने म्हसवड येथील प्राथमिक आरोग्य केंद्रात दाखल केले. मात्र दुखापत गंभीर असल्याने पुढील उपचारासाठी त्याला सातारा जिल्हा रुग्णालयात हलवण्यात आले. डॉक्टरांनी तपासणी केल्यानंतर मुलाच्या डाव्या हाताच्या दंडाला आणि नाकाला फ्रॅक्चर झाल्याचे स्पष्ट झाले. दरम्यान शुद्धीवर आल्यानंतर मुलाने घडलेला सर्व प्रकार आपल्या वडिलांना सांगितला. त्यानंतर ११ मार्च रोजी सचिन करडे यांनी म्हसवड पोलिस ठाण्यात फिर्याद दाखल केली.
या प्रकरणी पोलिसांनी आरोपी रोहित सुभाष लोखंडे याच्याविरुद्ध गुन्हा दाखल केला असून पुढील तपास पोलिस उपनिरीक्षक अनिल वाघमोडे करत आहेत. या घटनेमुळे परिसरात संतापाची भावना व्यक्त होत आहे.

पोलिसांच्या बैठकीत निर्णय वितरकांनी मांडले समस्यांचे गाऱ्हाणे अमेरिका-इस्रायल आणि इराण यांच्यातील युद्धाच्या पार्श्वभूमीवर गॅस टंचाईची भीती निर्माण झाल्याने सातारा शहरासह जिल्ह्यातील गॅस एजन्सीजसमोर नागरिकांच्या लांबच लांब रांगा लागत आहेत.

काही ठिकाणी नागरिक आणि गॅस वितरण कर्मचाऱ्यांमध्ये वडाचे प्रकार घडत असल्याने परिस्थिती नियंत्रणात ठेवण्यासाठी रविवारपासून गॅस सिलिंडर वितरणासाठी होमगार्डचा बंदोबस्त ठेवण्याचा निर्णय घेण्यात आला आहे. शनिवारी सातारा शहर पोलिस ठाण्यात सपोनि अविनाश माने यांच्या उपस्थितीत शहरातील गॅस वितरकांची बैठक घेण्यात आली.

या बैठकीस चंद्रकांत मावशे,हेमंत जाजू, अभय बाजारे-साळुंखे, सस्मित वाघोलीकर, यशराज भोसले, चंद्रकांत पाटील, युवराज माने यांच्यासह वितरक उपस्थित होते.

या बैठकीत वितरकांनी नागरिकांची वाढती गर्दी निर्माण होणारे तणावाचे प्रसंग आणि वितरणावेळी येणाऱ्या अडचणींबाबत माहिती दिली. त्यानंतर आवश्यक त्या ठिकाणी तात्पुरता होमगार्ड बंदोबस्त आहेत.

सातारा शहरालगतच्या सोनगाव कचरा डेपोतील भीषण आगीच्या घटनेनंतर अखेर पालिका प्रशासनाने कठोर कारवाई केली आहे. या प्रकरणी संबंधित ठेकेदाराच्या निष्काळजीपणामुळे आग लागल्याचा ठपका ठेवत इंदोरच्या इको सेव्ह कंपनीच्या संचालकाविरोधात पोलिसांत गुन्हा दाखल करण्यात आला.

सोनगाव कचरा डेपोमध्ये नऊ मार्च रोजी सकाळी अकरा वाजण्याच्या सुमारास भीषण आग लागली होती. सात एकर परिसरात पसरलेल्या कचऱ्याला लागलेली ही आग गेल्या चार दिवसांपासून धुमसत असून, अद्यापही पूर्णपणे आटोक्यात आलेली नाही. या आगीमुळे सोनगाव आणि जकातवाडी परिसरातील नागरिकांना विषारी धुराचा मोठा त्रास सहन करावा लागत आहे.

या प्रकरणी सातारा पालिकेचे आरोग्य निरीक्षक राकेश गलीयल यांनी सातारा तालुका पोलिस ठाण्यात तक्रार दाखल केली. असून, इंदोर येथील इको सेव्ह प्रायव्हेट लिमिटेड कंपनीचे संचालक पुनीत शिसोदिया यांच्याविरोधात गुन्हा नोंदवण्यात आला आहे.

दरम्यान, या गंभीर घटनेची दखल घेत नगरसेवक राजू गोरे, नगरसेविका मुक्ता लेवे आणि नगरसेविका सिद्धी पवार यांनी देखील कारवाईची मागणी केली होती.या घटनेमुळे पालिकेच्या मालमत्तेचे मोठे नुकसान झाले असून, त्याचा पंचनामा पोलिसांकडून करण्यात येत आहे.

कचरा डेपोत यापूर्वीही आग लागण्याच्या घटना घडल्या आहेत. मात्र यावेळी लागलेली आग अत्यंत भीषण असल्याने ती आटोक्यात आणण्यासाठी पालिकेच्या आरोग्य आणि अग्निशमन विभागाची यंत्रणा अहोरात्र प्रयत्न करत आहे.

“हा प्रकार नागरिकांच्या जीविताशी खेळण्यासारखा आहे. या प्रकरणात कोणालाही पाठीशी घातले जाणार नाही. जे जे जबाबदार असतील त्यांच्यावर कठोर कारवाई केली जाईल. तसेच झालेल्या नुकसानीची भरपाई संबंधित ठेकेदाराकडून वसूल केली जाईल.”