ऐतिहासिक साताऱ्याच्या विकासाला आता मोठी चालना मिळणार आहे. राज्य शासनाने सातारा जिल्ह्यासाठी सुमारे ३५८ कोटी रुपयांचा विकास निधी मंजूर केला आहे.

सार्वजनिक बांधकाम मंत्री ना. शिवेंद्रराजे भोसले यांच्या पाठपुराव्यामुळे संगम माहुली येथे महाराणी ताराबाई समाधी परिसराचा विकास आणि सुशोभीकरणासाठी १३३ कोटी रुपये, तर किल्ले अजिंक्यतारा सुशोभीकरण व संवर्धनासाठी १३५ कोटी रुपयांची मंजुरी देण्यात आली आहे.

या प्रकल्पांतर्गत अजिंक्यतारा किल्ल्यावरील राजसदर, बुरुज आणि तटबंदी दुरुस्ती, तसेच पर्यटकांसाठी सुविधा आणि अत्याधुनिक प्रकाश व्यवस्था उभारली जाणार आहे.

तर संगम माहुली येथे महाराणी ताराराणी समाधी परिसर, नदी घाट, मंदिरांचे जतन आणि परिसराचे सुशोभीकरण करण्यात येणार आहे.याशिवाय पर्यटन वाढीसाठी मुनावळे ते किल्ले वासोटा रोपवे, तसेच कराड विमानतळाचा विकास आणि नाईट लँडिंगची मंजुरी देखील देण्यात आली आहे.

या सर्व प्रकल्पांमुळे साताऱ्याच्या पर्यटनाला मोठी चालना मिळणार असून ऐतिहासिक वारसा जतन करण्यासही मदत होणार आहे.

दरम्यान, या मंजुरीबद्दल ना. शिवेंद्रराजे भोसले यांनी मुख्यमंत्री देवेंद्र फडणवीस आणि राज्य सरकारचे आभार मानले आहेत.