वाईमध्ये धक्कादायक फसवणुकीचा प्रकार समोर आला आहे. आर्थिक अडचण असल्याचे सांगून 12 तोळे 7 ग्रॅम सोन्याचे दागिने, कार आणि 2 ते 3 लाख रुपये घेऊन फसवणूक केल्याच्या आरोपावरून एका श्रेणी पोलिस उपनिरीक्षकासह तिघांवर गुन्हा दाखल करण्यात आला आहे. मात्र, गुन्हा दाखल होऊनही अद्याप कारवाई न झाल्याने तक्रारदार कुटुंबाने वरिष्ठांकडे धाव घेतली आहे.
या प्रकरणी श्रेणी पोलिस उपनिरीक्षक संपत भोसले, अजिंक्य जाधव आणि तुषार ताटे यांच्याविरोधात वाई पोलिस ठाण्यात गुन्हा दाखल झाला आहे. तक्रारदार सीमा सचिन जमदाडे यांनी दिलेल्या माहितीनुसार, त्यांचे पती सचिन जमदाडे हे जिल्हा पोलिस दलात कार्यरत आहेत. त्याच ओळखीमुळे संपत भोसले यांचे त्यांच्या घरी येणे-जाणे होते.

सीमा जमदाडे यांचा हॉटेल व्यवसाय असून त्या व्यवसायासाठी कारचा वापर करत होत्या. 1 मार्च 2019 रोजी संपत भोसले आणि त्यांचे सहकारी हॉटेलमध्ये आले आणि काही कामासाठी कार हवी असल्याचे सांगत कार नेली. काही दिवसांत परत करतो, असे आश्वासनही त्यांनी दिले.

त्यानंतर मुलाच्या शिक्षणासाठी पैशांची गरज असल्याचे सांगून सोन्याचे दागिने घेतल्याचा आरोप आहे. एवढेच नव्हे तर कोरोनामुळे आर्थिक अडचण निर्माण झाल्याचे कारण देत तक्रारदारांच्या पतीकडून 2 ते 3 लाख रुपये गुगल पे आणि रोख स्वरूपात घेतल्याचेही तक्रारीत नमूद करण्यात आले आहे.मात्र, वेळोवेळी मागणी करूनही कार, सोन्याचे दागिने आणि पैसे परत न दिल्याने आपली फसवणूक झाल्याचे तक्रारदारांचे म्हणणे आहे. यानंतर त्यांनी वाई न्यायालयात धाव घेत संशयितांविरोधात तक्रार अर्ज दाखल केला.

न्यायालयाच्या आदेशानंतर 2 फेब्रुवारी 2026 रोजी वाई पोलिस ठाण्यात अखेर गुन्हा दाखल करण्यात आला.

मात्र, गुन्हा दाखल होऊन तब्बल दीड महिना उलटूनही संबंधितांवर ठोस कारवाई न झाल्याचा आरोप केला जात आहे.
एकीकडे कायद्याचे रक्षण करणाऱ्या यंत्रणेतील अधिकाऱ्यावरच फसवणुकीचा आरोप झाल्याने या प्रकरणाने खळबळ उडाली आहे. आता या प्रकरणात वरिष्ठ अधिकारी कोणती कारवाई करतात, याकडे सर्वांचे लक्ष लागले आहे.

साताऱ्यात शेअर मार्केटमधून दरमहा १० टक्के परताव्याचे आमिष दाखवून तब्बल १६ लाख रुपयांची फसवणूक झाल्याचा धक्कादायक प्रकार समोर आला आहे. या प्रकरणी ‘आर. के. ट्रेडिंग कॅपिटल’चा मालक रोहित विनोद काठाळे याच्याविरोधात शाहूपुरी पोलीस ठाण्यात गुन्हा दाखल करण्यात आला आहे.

फिर्यादी कुणाल सुभाष पवार यांनी दिलेल्या तक्रारीनुसार, २०२३ साली ते राजवाडा परिसरातील काठाळेच्या कार्यालयात गेले होते. यावेळी आरोपीने फॉरेक्स आणि इंडियन शेअर मार्केटमध्ये गुंतवणूक केल्यास दरमहा १० टक्के नफा देण्याचे आश्वासन दिले होते.या आश्वासनावर विश्वास ठेवून पवार यांनी फेब्रुवारी २०२५ मध्ये ऑनलाईन आणि एनईएफटीद्वारे १६ लाख रुपये गुंतवले. तरीही महिने उलटूनही कोणताही परतावा मिळाला नाही.

परताव्याबाबत विचारणा केली असता आरोपीकडून टाळाटाळ सुरू होती. आपण फसवणुकीचा बळी ठरलो असल्याचे लक्षात येताच पवार यांनी गुंतवलेली रक्कम परत मागितली, मात्र आरोपीने एकही रुपया परत दिला नाही. सप्टेंबर २०२५ पासून आरोपी रोहित काठाळेचा मोबाईल फोन बंद असून तो दिलेल्या पत्त्यावरही राहत नसल्याचे समोर आले आहे.

यानंतर पवार यांनी शाहूपुरी पोलीस ठाण्यात तक्रार दाखल केली असून,आपल्यासारख्या अनेक नागरिकांची कोट्यवधी रुपयांची फसवणूक झाल्याचा संशय त्यांनी व्यक्त केला आहे.दरम्यान, २७ सप्टेंबरपासून आरोपीचा मोबाईल बंद असल्याची माहिती पोलिसांनी दिली आहे. आरोपीकडून नेमकी किती जणांची फसवणूक झाली, याचा सखोल तपास करण्याची मागणी आता नागरिकांकडून होत आहे.